Aizawl Sahuanah sakei dah a ni

Aizawl Zoological Park (Sahuan), Sakawrtuichhun ramah February 14, Thawhṭanni tlai dar 5 vel khan sakei dah thar a ni a, Aizawl Sahuana sakei (keipui) dah hmasak ber a ni.

Aizawl Zoo range officer Immanuela chuan, sakei chu Guwahati sahuan aṭanga lak a nih thu Vanglaini a hrilh a, "Central Zoo Authority phalnain Guwahati Zoo nen ramsa inthleng tawn (exchange programme) kaltlangin kan la a, Aizawl Sahuan aṭangin Guwahati Zoo hian February 2021 khan hauhûk nupa an la ve thung. Sakei dahna tur hmun kan siamṭhat avangin duh angin kan la hma thei lo," a ti.

A tirah sakei chu a nu leh pa la tura an inbiak thu sawiin Immanuela chuan, "February 8, 2022 khan la turin Guwahati kan pan a, khu lamah harsatna eng emaw a awm avangin sakei nu chiah kan la thei. Sakei pa aiah spirit deer leh sangái la mai turin min ti a, department hotute'n hemi chungchangah hian thutlukna an siam ang," a ti a; nimin tlai khan department hotute chu an ṭhukhawm tih a sawi.

Range Officer chuan, Aizawl Sahuan chu Covid-19 léng vanga sorkar inkaihhruainain hawn a la phal loh avangin mipui tan tlawh theih a la nih loh thu sawiin, "Tunah hian mipuiin tlawh thei pawh ni se, sakei hi chu kan la pho chhuak dawn rih lo. Amah a insiam rem (adjust) nan chawlhkar hnih chhung feeding cell-ah kan la khung dawn a, chumi hnuah chauh mipui hmuh theihin kan pho chhuak ang," a ti a; sakei chu a bik taka enkawl ngai a nih thu leh ni khatah sa kg. 8 vel a ei tura ngaih a nih thu a sawi bawk.

February 8, 2022 khan assistant conservator of forest (Wildlife) C Chawnghmingliana, Vety officer Dr John Lalhnuna, Aizawl Zoo range officer Immanuela leh sahuana thawk mi pangate chu sakei la turin Guwahati Zoo-ah an kal. Guwahati Zoo thuneitute nen an indàwr hnuah sakei pakhat an la a, February 14, 2022 (Thawhṭanni) tlai dar 5 vel khan Sahuanah an dah lut a ni.

June 22, 2021 khan Environment, Forest & Climate Change minister TJ Lalnuntluanga chuan Aizawl Sahuanah sakei dah tum a nih thu a lo sawi tawh a ni.