Tlawng luia mau tawlh tum man

Kolasib-a Environment, Forest & Climate Change (EFCC) depart­ment mite chuan nimin khan Tlawng lui kaltlanga Mizoram aṭanga state páwna mau pum 7,500 tawlh tum hnam dang an man.

Kolasib DFO Margareth Lalram­chhani sawi danin, Bairabi bul Tlawng luiah hnam dang mau sâtte'n state páwnah thiar chhuah tumin mau eng emaw zat lui dungah an tawlh a, chu'ngte chu Bairabi Forest RO leh a hote'n lo tidingin an mansak a ni. Mau tawlhtute chu dan anga chhiah an chawi tur zat lêt ruk chawitir an ni dawn. Maute chu hnam dang mi pahnih ta a ni a, a vaiin pum 7,500 a ni.

February 14, Thawhṭanni pawh khan Kolasib DFO chuan Pang­balkawn VC huam chhungah hnam dang mau tawlh tumte an mau sah sa pum 5,550 a man sak tawh a; mimal huana ILP nei lo mau sah tuma riahbûk sual mekte pawh a hmunah kalin an man a, ILP nei lote chu Bairabi Police Station-ah a hlân.

Hetih lai hian, mau hi Horticul­ture department kutah sorkarin a dah a, mahse, dan anga thuneihna lekkawh turin thawktu an nei lo a, hremna pek dan turah pawh thuneitute aṭangin thu dawn an la nei lo nia thu dawn a ni.