Airport-a Covid-19 vei hmuh a tlahniam

January thla tìr lamah Lengpui Airport kaltlanga state pawn aṭanga Mizorama lut zingah Covid-19 vei hmuh a tam laiin, February thla tìr lam aṭangin hmuh zat a tlahniam tial tial. January thla tàwp lam aṭangin India rama state hrang hrangah Covid-19 positive hmuh zat a tlahniam nia hriat a ni.

Nikum December thla tàwp lam leh kumin January thla tìr aṭangin India ram, a bikin thlawhtheihna hmanga Mizoram (Lengpui Airport) pawhtu khawpuiahte hripui chi thar Omicron a darh nasa a; January 6, 2022 aṭangin state pawn aṭanga Mizorama lut zawng zawng, Covid-19 vaccine la kim tawhte pawh RAT hmangin swab sample endik vek tura tih a nih angin, Lengpui Airport-ah pawh endik ṭan nghal a ni.

State páwn aṭanga Lengpui Airport kaltlanga Mizorama lutte endik vek ṭan ni, January 6-ah positive mi 38 hmuh chhuah nghal a ni a, a hnu lama lutte zingah pawh hmuh chhuah belh zel niin, hmuh tam ber ní nia hriat January 15-ah chuan mi 54 hmuh a ni.

Kumin January thlaah hian Pathianni tih lohah chuan Lengpui Airport-a RAT hmang swab test-ah Covid-19 positive mi eng emaw zat hmuh chhuah a ni ṭhin a; ni tam zawkah chuan mi 20 aia tam hmuh a ni ṭhin.

January thla tàwp lam aṭangin Lengpui Airport-a positive hmuh zat a tlahniam a, February thlaah tlahniam zualin, February ni 1 aṭanga ni 14 inkarah mi 10 aia tam hmuh chhuah ní ni hnih (ni 7 leh ni 10) chiah a awm tawh a ni.