Manipur inthlana duty turte vailiam

Manipur MLA inthlan, February 28, 2022 aṭanga neih tura venhim hna thawktu tur Mizoram armed police force-te chu nimin khan 3rd MAP parade ground-ah DGP Devesh Chandra Srivastva-a'n a vailiam.

Devesh Chandra Srivastva chuan, Mizoram police chu India rama police ṭha pawl an nih thu sawiin, "Police mai ni lo, Mizoram leh a chhunga chengte aiawha kal in ni a, in duty-naah kawng engkimah hna ṭha taka hlen a, felfai leh mahni invawng uluk takin awm ang che u," a ti a; an duty-naah kum upa, rualbanlo leh nunau puih ngai an awm chuan pui turin a chah.

Manipur inthlanah hian Mizoram state armed police force company 10 an duty dawn a, March 5, 2022 thleng an duty ang. Police-te hian nimin khan an duty-na hmun tur ṭheuh an pan a ni.