Lungleiah Handloom Expo buatsaih

Ministry of Textiles bultumin nimin khan Lunglei Chanmari Hall-ah Mizoram Apex Handloom & Handicraft Cooperative Society Ltd (MAHCO) chuan Lunglei Special Handloom Expo an buatsaih ṭan a, Mizoram State Cooperative Societies (MSCS) registrar Lalrinsanga'n a hawng. Expo hi February 28, 2022 thleng awh tur a ni.

Expo hawnna inkhawm hi MAHCO managing director Robuanga'n a kaihruai a; MSCS registrar Lalrinsanga chuan, puantah lam buaipuitute chu Industries leh Cooperation department-a registration nei an nih thu sawiin, "Tun hma deuh chuan hamṭhatna ṭha zawkte a awm ṭhin laiin, tun hnuah erawh a awm mumal ta meuh lo. Sorkar aṭanga hamṭhatna hmuh tur awm lo chunga in la kalpui hram hram hi in fakawm tak zet a ni," a ti.

Society-te chu industry leh cooperative society-a an inziah luhna ngai pawimawh tura chahin Lalrinsanga chuan, "Kan industry-ah hmuh theihin kan tarlang tur a ni," a ti a; management leh dan zawm ṭheuh turin a chah bawk.

Special Handloom Expo-ah hian dawr 20 a awm a, Mizo kutchhuak thawmhnaw leh thil dang chi hrang hrang tláwm zawka lei theihin pho chhuah a ni. Mizoram State Legal Services Authority leh Lunglei Legal Services Authority-te'n dan leh hrai inhrilhhriatna an buatsaih nghal a ni.