Children’s Science Congress-ah tel

Sorkar laipuia Depart­ment of Science & Technology hnuaia National Council of Science & Technology Communication (NCSTC) chuan nimin khan online kaltlangin 29th National Children’s Science Congress an buatsaih ṭan a, Mizoram aṭangin zirlai pariat an tel.

National Children’s Science Congress hi Gujarat Coun­cil on Science and Tech­nology (Gujcost) leh Depart­ment of Science & Technology, Government of Gujarat-in an thleng a; nimin khan Gujarat chief minister Bhupendrabhai Patel-a'n a hawng a ni.

Children’s Science Congress-ah hian India ram state leh union territory-te bakah, ASEAN ram aṭangin child scientist 683 telin, research project hmangin an intihsiak a; Mizoram aiawhin child scientist pariat telin, nimin khan tluang takin project presentation an ti a ni.

Mizoram aiawha tel tur project thlanna chu Science Teachers Association Mizoram (STAM) leh Samagra Sikhsha, Mizoramin an buatsaih a, district level-a intihsiak a nih hnuah state level intihsiaka ti ṭhate aṭangin Mizoram aiawh tur an thlang.

National level Children Science Congress ṭan kum, 1993 aṭangin STAM chuan child scientist an lo tir tawh a, kumin thlengin Mizoram aiawhin child scientist mi 290 an tír tawh a ni.