Covid-19 endik tamna ber kan ni - Dr R Lalthangliana

Health & Family Welfare minister Dr R Lalthangliana chuan, Mizoram chu mihring chêng zat aṭanga chhûtin Covid-19 vei leh vei loh endik tamna ber a nih thu a sawi a, "Test an tam chuan hripui vei hmuh chhuah pawh an tam lo thei lo," a ti.

Nimin khan Civil Hospital, Aizawlah thu sawiin Dr R Lalthangliana chuan, "Covid-19 test hrim hrimah kan tam fál nalh, chu chu kan danglamna a ni. Hripui vei kan tam laiin, thi zatah erawh kan tlem hle thung. Hripui vei zinga 0.32%-in nunna an chán a, chu'ng zinga 83% chu natna khirhkhân tak nei sa an ni," a ti a; sorkar laipui pawhin Mizoram an fak niin a sawi.

Health Minister chuan, hmun hrang hrangah hripuiin kiam lam a pan ṭan thu sawiin, "Keini hi a lèn reina pawl kan ni mai thei. Mahse, theihtawpin ṭan kan la a, hmachhawn dan kan thiam chho ṭan," a ti.

Mizoramah Omicron vei hmuh a nih thu sawiin R Lalthangliana chuan, "A treatment proposal eng emaw ngaihtuah thar deuh a ngaiin ka ring," a ti a, Omicron hmuh a nih tâk avangin chi dang deuh hleka kal a ṭul thu a sawi.