NE on Wheels’ Tour buatsaih dawn

Amazing Namaste Foundation hruaitute chuan nimin khan Governor Dr Hari Babu Kambhampati chu Raj Bhavan-ah an kâwm a, North East on Wheels’ Tour chungchang an sawipui.

Amazing Namaste Foundation hian Azadi ka Amrit Mahotsav pualin bike 75 hmanga India hmarchhak fan chhuahna hun ‘North East on Wheels’ an buatsaih dawn a, tour-a tel turin Mizo biker-te an sáwm a ni.

Governor chuan, Azadi ka Amrit Mahotsav lawmna puala North East on Wheels neih a ni tur leh Mizoram pawhin a thleng tur chu lawmawm a tih thu a sawi a, "He tour pawimawh tak hian hmarchhaka chêngte leh hmun danga chêngte inkarah inhriat chian zawkna leh inkungkaihna ṭha zawk a siam dawn a, Mizoram mawi tak leh a chhunga chêng hawihháwm takte páwn lam mite'n an rawn hmu thei tur hi thil lawmawm tak a ni," a ti.

North East on Wheels Tour hi ni kaw chhung neih tur a ni a, India ram hmun hrang hranga biker-te chu tel tura sàwm an ni. Mi 75 tel thei tura ruahman a ni a, km 1,400 chuang bike hmanga tlân kualin, India hmarchhak state zawng zawng an tlawh chhuak dawn a ni.

Tour-a tel duh tan phone number 8794571126 leh 9436350058-ah inziah luh theih a ni a, inziak lutte aṭangin mi 75 thlan an ni ang. Hre chiang duh tan www.northeastonwheels.in ah en theih a ni.