Journalist Pension Scheme sawiho

Information & Public Relation (IPR) minister Lalruatkima hoin nimin khan a pisaah Journalist Pension Scheme ruahmanna Study Team-in an zirchianna chu IPR department hotute nen an sawiho.

Ṭhutkhawmah hian MJA-in sorkara Pension Scheme ruahmanna an thehluh leh chumi chungchanga Study Team zirchiannate an sawiho hnuah, ruahmanna leh zirchiana bung ṭhenkhat her rem ngai te, thu thlak ngai leh ṭul dangte chu rang takin IPR department-in buaipuiin, Law & Judicial department leh Finance department-ah an ngaihdan la tura thawn vat ni se, an ti.

Sorkar thuchhuah tarlan danin, MJA chuan nikum khan sorkarah Journalist Pension Scheme an duan thar chu an thehlut a, sorkar chuan an ruahmanna thehluh zir chiang turin Law & Judicial, Finance leh IPR department aiawh pakhat ṭheuh telna Study Team a din. Study Team chuan an zirchiana chu kumin February thla tir khan IPR department-ah an thehlut a ni.