Covid-19 léng dinhmun sawiho

Lawngtlai District Task Force on Covid-19 chu nimin khan an chairman Dr Andrew H Vanlaldika, bawrhsap kaihhruaiin DC conference hall-ah an ṭhukhawm a, hmalakna kal mek leh hmalak zel dan turte an sawiho.

Dr Andrew H Vanlaldika chuan, hripui léng thawh thumnain Lawngtlai district-ah a vanglai a thleng mek tih sawiin, "Mi tinin hripui laka fihlim tura tih tur leh tih loh turte an zawm ṭhat a ṭul zual. Kohhran tina SOP Implementation Committee leh khaw tina CAB Implementation Team kaltlang hian mahni huam chhungah ṭheuh CAB/SOP zawm tura hmalak mek a ni," a ti.

Ṭhutkhawmah hian Covid-19 donaa mawhphurhna hrang hrang neitute'n hma an lak dan an tarlang a, rawtna an thlen nghal bakah, harsatna leh a chinfel dan turte an sawiho a ni.

Lawngtlai district-ah hripui vei enkawl lai mi 281 an awm a, an zinga mi 23 chu ráltlân an ni. Ráltlân zinga hripui veite enkawlna atana Lawngtlai AOC Venga CCCC ruahmanah mi pakua enkawl mek an ni a, khum 15 awmna DCHC-ah mi pathum, CCCC-ah mi pariat leh mahni in lama inenkawl mi 261 an awm.