KHAWTHLIR

DC leh MJA inkawm

Mamit DC Lalnunhlua chuan nimin khan Mizoram Journalist Association (MJA), Mamit district member-te a pisaah a kâwm. Bawrhsap chuan MJA-te chu thu belhchian dâwl lo hnualsuat tur leh thu dik pawh mipui tithlabár leh tichîâi lo zawnga puanzar dan thiam turin a chah a, "MJA-te chu mipui hnena sorkar hmalakna puangzartu, a ṭha lam leh a chhe lam zawng pawha mi rilru kaihruai theitu in nih avangin mi pawimawh tak in ni," a ti. Inkawmnaah hian Mamit IPRO Paul Rokima pawh a tel a ni.

ATM sawiho

Lawngtlai khawpuia bank hrang hrang hotute chuan nimin khan bawrhsap Dr Andrew H Vanlaldika hoin pawisa lak chhuahna khawl, automated teller machine (ATM) chungchang an sawiho. Customer-te'n ATM booth-a khawl hman dan kaihhruainate chhiar nacháng an hriat a, fimkhur taka ATM an hman ṭhin a pawimawh thu an tarlang. Lawngtlaiah hian SBI, MCAB, Canara Bank leh HDFC-te'n ATM booth pakhat ṭheuh an nei mek a ni.

NSS-in DCHC tanpui

State NSS office bultumin Aizawla NSS unit pakua chuan nimin khan Mualpuia Dedicated Covid Health Centre-a hman turin hmanrua leh bungrua chi hrang hrang an pe. Thilpek petute chu PUC, Hrangbana College, J Thankima College, Mizo HSS, Chaltlang HSS, Zemabawk HSS, MICE, Durtlang HSS leh Synod HSS-te an ni a; pawisa Rs 10,000 leh bungrua eng emaw zat an pe a ni.

Start-Up Investment Fest 2022 ṭan

North East Venture Fund (NEVF) chuan NEDFi, DoNER leh SIDBI-te puihnain nimin khan Start-Up Investment Fest 2022 an buatsaih ṭan a, March 15, 2022 thleng a awh dawn. Start-Up Investment Fest 2022-ah hian a duh apiang tel theih a ni a; tel tumte tan nimin aṭang khan registration an hawng ṭan a, March 15 thleng registration tih theih a ni ang. Inziak lut duhte tan https://registration.nedfivent... ah inziah luh tur a ni a; Fest-a telte zinga business idea nei ṭhate chu Investment Board hmaah presentation an ti ang a, chuta ti ṭhate chu venture fund an pe dawn a ni.