Joint NGO-in ramria duty police-te tlawh rêl

NGO Coordination Committee chu nimin khan Central YMA Committee Room-ah an ṭhukhawm a; ramria venhim hna thawktu Mizoram police-te hun remchang hmasa bera tlawh chhuah vek an rêl.

Joint NGO ṭhukhawm hi chairman R Lalngheta, CYMA president-in a kaihruai a; February 9, 2022-a ramria duty Mizoram police-te an tlawh chungchang thlir lêtin, police-te mamawh hrang hrang sorkarah thlen dan tur an ruahman. Ramria police duty-te'n solar plate, tui leh lirtheite an mamawh thu an sawi.

NGO Coordination Committee hian budget an ruahman nghal a; YMA, MUP, MZP leh MSU-te chu Rs 20,000 ṭheuh thawh tur leh MHIP chu Rs 10,000 thawh turin an ti a ni.