Academic session kal mekah Sikul kal hman beisei tawh lo; Session thar aṭangin kaltir ngei duh

School Education department chuan academic session kal mek 2021-22 chhungah chuan sikul kal theih an beisei tawh lo a, session thar aṭang chuan zirlaite'n sikul an kal ngei theih nan theihtawp chhuah an tum.

Vanglaini palai zawhna chhangin School Education minister Lalchhandama Ralte chuan, zirlaite sikul kaltir chu an duhthusam a nih thu a sawi a, "Mahse, mihring nunna khawih thil a nih avangin fimkhur taka thil ngaihtuah a ngai. Hri léng mek hi disaster thil a nih angin Disaster Management & Reha­bilitation hnuaia State Executive Committee (SEC) thutluknaah kan innghat," a ti.

Education Minister chuan, SEC-ah zirlaite sikul kal chungchanga an ngaihdan an zawh ṭhin thu sawiin, "Kan hriin kiam lam a pan thei si lo a, zirlaite sikul kaitir a rem rih lo a ni," a ti a; hri kai dinhmunin ziaawm lam a pan deuh laiin, sikul kai hun atan ruahmannate siam ṭhin mahse a rem loh leh ṭhin thu a sawi.

Lalchhandama Ralte chuan, tun dinhmunah hripui vei an la tam thu sawiin, "Academic session kal mek a tàwp hnai tawh bakah, hripui vei dinhmun a la tlakhniam loh avangin academic session kal mekah hi chuan zirlaite'n sikul an kal theih a rinawm tawh lo," a ti.

Academic session thar 2022-23 aṭang chuan zirlaite'n sikul kal ngei thei tawh se an duh thu sawiin Minister chuan, "Central YMA hruaitute nen pawh kan sawiho a, awareness ṭha tak neiin, zirlaite'n sikul an kal ngei theih dan tur kan sawiho," a ti a; zirlaite'n academic session thar aṭang chuan sikul an kal theih tawh ngei chu an beisei leh duhthusam a nih thu a sawi.

Board exam tur zirlai (pawl 10 leh 12) ni lo zawng chu an sikulah an exam theih a beiseiawm lo tih sawiin Lalchhandama Ralte chuan, "Thu thar a awm a nih loh chuan sikulin online hmangin an remchan angin exam an buatsaih a ngai dawn. Class X leh XII erawh offline hmanga exam tir ngei kan tum a, ṭha taka an exam theihna atan theihtawp kan chhuah a ni," a ti.