MSU-in Kamrul-a zawn an tum

Mizo Students’ Union (MSU) chuan, Kamlova Chhangte tia hming invuaha schedule tribe certificate nei Kamrul Laskar Uddin-a'n February 18, Ningani ral hmain a tribal certificate sorkara a pe lêt (surrender) lo a nih chuan amah zawn hna an thawh dawn thu an puang.

MSU chuan, dik lo taka tribal certificate Kamlova Chhangte inti hnena pek chu sût (cancel) turin November 23, 2021 khan Aizawl DC hnenah ngenna an thehlut tih sawiin, "Sorkar lamin bawhzuiin, inquiry lak nghal a ni a, vanduaithlak takin Bawrhsap Pisapui kan avangin DC lam hmalakna a khaihlak ta a ni," an ti a; Kamrul Laskar Uddin pawh an bia a, innawr buai ngai loa amah ngeiin a ST certificate chu cancel dilna ziaka thehlut turin thuràwn an pek thu an tarlang.

February 5, 2022 khan Kamrul Laskar Uddin chu MSU pisaah a léng tih sawiin MSU chuan, "February 7, 2022-ah DC office-ah tribal certificate cancel tura ngenna lehkha thehlut turin a intiam a, February 7, 2022 a thlen chuan Kamrul Laskar Uddin chuan MSU hruaitute chu hna pawimawh a neih avangin lehkha a thehluh hman loh thu a hrilh," an ti a, chumi hnuah Kamrul chu biakpawh theih loh leh chin hriat lohin tun thlengin a awm zui ta tih an sawi.

MSU chuan, Mizote tribal nihnain a ken tel hamṭhatna chuhpui duhtu chu Mizo hnam tana mi hnawk taka an ngaih thu sawiin, "Ṭha taka kan dawrna zah lotu chêt dan hi en liam mai har kan ti a, MSU hnena a intiam ang ngeia tribal certificate hi February 18, 2022 hmaa a surrender lo a nih chuan MSU chuan Kamrul Laskar Uddin zawn hna kan thawk dawn a ni," an ti.

An hmalakna thláwp tlat tur leh Kamrul Laskar Uddin awmna chin hria chuan MSU hruaitute hnena hriattir turin MSU chuan Mizo mipui an ngen a ni.

Kamrul-a hi Lengpui Airport chei ṭhat hna thawk mêktu zingah a tel a, hei bakah hian Mizoram sorkar hnuaiah hna dang lian tham tak tak a thawk a ni.