Kuhva rah tawlh rûk danna tura siam Sihhmuia check gate tharah duty ṭan

Mizoram sorkarin Myanmar aṭanga dan loa kuhva rah tawlh rûk danna atan Sairang Sihhmuia Zero Point chhak deuhah check gate a siam thar a, February 14, 2022 aṭang khan police an duty ṭan. Check gate hi February 15, Thawhlehni khan police hotute leh Central YMA hruaitute'n an enfiah a ni.

Central YMA chuan, "Dan loa kuhva tawlh rûk dan nan leh a ti luite manna tur check gate rintlak tak siam tura CYMA-in sorkar hotute hnena a ngenna tihhlawhtlin nana siam, Sairang Sihhmui Zero Point thlen thlak hma lawka police check gate siam tharah February 14, 2022 (Thawhṭanni) zan aṭang khan duty ṭan a ni ta," an ti a; check gate siam a nih tak avangin an lawm thu an tarlang.

CYMA tarlan danin, check gate thar hi February 15 khan CYMA hruaitute leh Mizoram police hotute - DIG (Hqrs) Lalbiakthanga Khiangte, DIG (Northern Range) Neihchungnunga leh Aizawl SP C Lalruaia ten a hmunah an enfiah a ni.

DIG Lalbiakthanga Khiangte sawi danin, check gate enkawla vil reng turin Sairang Police Station ruat a ni a, chuvang chuan Sairang PS chu thuam ṭhat niin, thawktu dah belh a nih bakah, changtlung zawka la thuam belh zel an tum a ni.

CYMA president R Lalngheta chuan, Mizoram sorkar hmalakna lawmawm an tih thu sawiin, "Kan ngenna rang taka an tihhlawhtlin vat avangin Mizoram sorkar hotute chungah läwm thu kan sawi," a ti a; CYMA general secretary Prof. Lalnuntluanga pawhin, dan loa kuhvaa sumdawnna tihtawp kawngah YMA-in police-te hma an lakpui tlat tur thu a sawi.

Police hotute leh Central YMA hruaitute chuan vawiin hian dan loa kuhva tawlh rûk danna atana Sailiamkawn, Serchhipa check gate siam thar an tlawh leh dawn a, hawn nghal a ni ang.