State Central Library-ah IAS Book Corner

Mizoram Youth Commission (MYC)-in State Central Library-a IAS Book Corner an buatsaih chu nimin khan MYC chairman Dr Vanlalṭanpuia, MLA-in a hawng. IAS Book Corner-ah hian lehkhabu chi hrang 193 dah a ni a, a vaiin bu 846 a ni.

MYC Chairman chuan, MYC-in ṭhalaite tana hma a laknaah Chief Minister leh Deputy Chief Minister-te'n an thlàwp ṭhat thu a sawi a, "CM Pu Zoramthanga kaihhruai ministry hmasaah khan ṭhalaite inpui MYC din a ni a, tunah theihtawp chhuaha hma kan laknate min tuipuiin, nikum khan full sponsorship-a Delhi-a IAS coaching centre-a kal tur Super IAS 20 kan tir. Tunah hian Super IAS 40 kalpui kan tum leh mek," a ti.

Vanlalṭanpuia chuan, tun hnaia Mizo zinga central service-a inziak tling an tlem chu an vei thu sawiin, "A chhan zir chiangtu tur Fact Finding Team din kan tum," a ti a; sorkarin sum tam tak sénga zirna hmanrua a chhawpsakte chu hmang ṭangkai tur leh tumruhna nena inzir turin Mizo ṭhalaite a chah.

State librarian Zirsangzuali tarlan danin, IAS Book Corner-a lehkhabu leh hmanrua chi hrang hrang lei nan MYC-in State Central Library-ah cheng nuai 10 a pe a; tun dinhmunah lehkhabu chi hrang 193 lei tawhin, a vaiin bu 846 a ni. Lehkhabu 846 lei nan Rs 3,33,977 hman a ni tawh a, Rs 1,32,000 sêngin lehkhabu dahna tur (book rack) pali lei thar a ni. IAS Book Corner atan hian Rs 4,65,977 hman tawh niin, hman loh Rs 5,34,023 a la awm.