Lungleiah MJA tan a thlàwna inentirna

Civil Hospital, Lunglei (CHL) chuan nimin khan Mizoram Journalist Association (MJA), Lunglei district member-te tan a thlàwna inentirna, free health check-up an buatsaih.

CHL medical superintendent Dr SR Ngurchamliana chuan, hun danga an la tih ngai loh, Lunglei MJA member-te puala free health check-up an buatsaih thei chu thil lawmawm a nih thu sawiin, “Hetiang hi MJA member-te tan tih kan duhna a rei tawh a, vawiinah a tak kan thleng thei ta hi kan lawm tak zet,” a ti a; investigation hrang hrang leh ṭul dangte hmangin MJA member-te hriselna endik a nih tur thu a sawi.

MJA Lunglei president Laltlanthanga chuan, Lungleiah MJA-te puala a vawi khatna atana free health check-up neih a nih theihna tura hma latu Health minister Dr R Lalthangliana leh medical superintendent Dr SR Ngurchamliana bakah, a thawhpuite inpekna leh hmalaknaah an lawm thu a sawi a, “CHL tana ṭangkaina kan neihna apiangah theihtawp chhuah kan inhuam,” tiin, thawhhona ṭha neih zel an duh thu a sawi a ni.

Free health check-up ah hian MJA member mi 16-in damdawi lam hmanraw hrang hrang hmangin an hriselna dinhmun an enfiahtir a ni.