MZU leh PUC-a project lungphùm phúm

Governor Dr Hari Babu Kambhampati chuan nimin khan Mizoram University-a project pali leh Pachhunga University College (PUC)-a project pahnihte lungphùm a phúm.

Dr Hari Babu Kambhampati chuan, zirlaite tana zirna ṭha pe tura MZU-in theihtawp chhuaha ṭan a la chu sorkar laipuiin a hriatpui tih a sawi a, "Hmasawnna ruhrel lian tak tak sakna tur sum a rawn ruahman hi a lawmawm tak zet. MZU hi university naupang tê ni mah se, India ramah a ṭha pawl a ni tawh. He hlawhtlinna ropui tak hi Mizoram tan inchhuanna tham a ni," a ti.

National Education Policy (NEP) 2020 a taka kalpuinaah MZU chu hma hruaitu zingah a tel tih sawiin Larsap chuan, "An ṭan laknate hi sorkar laipui chuan an hre chiang em em a, tun dinhmuna pawimawh ber chu skill development a ni," a ti a, nasa zawka ṭan la turin a chah.

National Institutional Ranking Framework tehna ang chuan MZU chu kum 2020 chhung khan India rama university ṭha tehnaah 67-na a ni a; Times Higher Education Impact Rankings 2021-in khawvela university ṭha zual 1,115 a thlan zinga 601 leh 800-na inkarah MZU a lang. Kum 2019 khan NAAC chuan MZU chu 'A’ grade a pe tawh bawk.

MZU leh PUC-a project paruk hi hostel pali leh academic building pahnih sakna tur a ni a, Ministry of Education (UGC) hnuaia EWS Scheme kaltlanga sum hmuh cheng vbc 60.31 sénga sak tur a ni.

Project hi Engineering Projects (India) Limited (EPIL)-in an thawk dawn a, thla 18 chhunga sak zawh tura tih a ni a; MZU leh contractor-te inremnaah project khawih chhungin project estimate ennawn theih a ni dawn lo.