Hripui donaa hlawhchhamah Congress party-in MNF sorkar an puh

Mizoram Pradesh Congress Committee (MPCC) chuan, Covid-19 léng thawh thumna a thleng ngei dawn tih a chian hnuah pawh inbuatsaihna mumal nei lo leh hripui donaa hlawhchhamah Mizoram sorkar an puh.

MPCC thuchhuah chuan, Covid-19 thawh thumna a thleng ngei dawn tih a chian hnuah pawh inbuatsaihna mumal nei lo leh hripui vei na zualte enkawlna tur leh Covid care centre ruahman belh loah sorkar puhin, “Sorkarin inbuatsaihna mumal a neih loh avangin Mizoram mipuite chu mahniin kan inenkawl ta mai mai a ni,” an ti.

Congress party chuan, “Mizoram sorkarin ruahmanna felfai tak a neih loh avangin kan thiam dan ang angin mipui kan inenkawl a ni ber a, hetiang taka Covid-19 donaa hlawhchham sorkar kan nei hi a pawi tak zet a ni,” an ti a; Meghalaya-ah chuan sorkar hriatpui home isolation-a awmte chu sorkarin damdawi leh thil pawimawh engkim a pek vek thu an sawi.

Covid-19 léng thawh thumna avanga sorkarin Aizawl bakah, Mizoram hmun danga khua/veng tam tak red zone-ah puang a, a khuahkhirh avangin hna thawktute harsatna a thlen mek tih sawiin MPCC chuan, “Sumdawngte leh ni tina inhlawhfate aṭangin hri a darh nasa bik tih finfiahna sorkarin a nei lo,” an ti a; Mizorama hna thawka awm vai tam takin ṭhekaa an thawh avangin a hmunah an awm chilh thei a, Mizo hna thawktute erawh chu chutiang a nih ve loh avangin Mizote nêkchêpna a nih thu

an tarlang.

MPCC chuan, Covid-19 donaah ruahmanna fel tak siam duh loah sorkar puhin, “Hripui darh dan zirchianna mumal taka kalpui duh si loa mipui, hna thawktute leh sumdawngte hrêk zawnga MNF sorkar a kal ṭhin hi ṭha kan ti lo,” an ti a, ruahmanna ṭha zawk siam turin sorkar an phût a ni.