Mizoram sorkarin central scheme nasa takin an pawngsual - BJP President

BJP, Mizoram Pradesh president Vanlalhmuaka chuan, Mizoram sorkarin mipui mamawh central scheme hrang hrangte khaw tam takah nasa takin an pawngsual niin a sawi.

Mizoram BJP President hian nimina Hriangtlang khua a tlawhnaah thu sawiin, “Mizoramin hun harsa tak kan tawk mek a, sorkar hian mipui mamawh central scheme hrang hrangte khaw tam takah nasa takin an pawngsual a, ni 100 inhlawhna te, Prime Minister Housing for All-te pawh a nihna tur ang ni loin an kalpui tlat. Hei hian miretheite an ngaih pawimawh lohzia a tichiang viau,” a ti.

Vanlalhmuaka chuan, thingtlanga kut hnathawktute’n an thawh rahte an hah mila an seng theih chu an chanvo a nih thu sawiin, “Kalphung fel tak duan a, Mizoramin mipui sorkar kan neih a ngai. Mipui sorkar leh development sorkar chu BJP-te hi kan nih avangin Mizoram hian BJP sorkar a mamawh hle a ni,” a ti a; Hriangtlang khawtlang hruaitute’n an mamawh an sawite chu Mizoram sorkarah leh sorkar laipuiah a theih ang anga an thlen tur thu a sawi.

Mizoram BJP President hian Hriangtlang khua hnenah hian buhfai, dailuah, alu leh hmai tuamna eng emaw zat a hlan a ni.