Mizoramah hripui vei nuai 2 an chuang tawh

February 15, Thawhlehni khan Mizoramah Covid-19 vei mi 1,616 hmuh chhuah a ni a, Covid-19 positive mi nuai hnih an chuang tawh. Nimin khan hripui vei dam tawh mi 1,694 chhuahtir an ni a, Covid-19 vei mi pahnih an thi.

Covid-19 vei Thawhlehnia hmuh tharte chu mipa 734 leh hmeichhia 882 an ni a; RT-PCR laboratory-a hmuh chhuah 256, TrueNAT hmanga hmuh 98, RAT hmanga hmuh 1,225 leh FIA hmanga hmuh 37 an ni.

Swab sample endikah Mizorama district zawng zawngah positivity rate 10% chung lam vek a ni a, district pariatah 20% chung lam niin, district pahnihah 30% chung lam a ni. Saitual, Hnahthial leh Kolasib district-ah chiah 20% a tling lo.

February 15-a Mizorama positivity rate chu 23.56% a ni a, ni 25 chhung a záwnin Covid-19 positivity rate 20% chung lam a ni tawh a, January 22, 2022 aṭang khan ni tin positivity rate 20% aia sang vek a ni. February thla chhungin positive mi 25,613 hmuh a ni tawh a, chawhrualin ni tin mi 1,707.53 hmuh chhuah an awm ang a ni.

Nimin tlai dar 5 thleng khan hripui vei dam tawh mi 1,694 chhuahtir an ni a; district tina chhuahtir zat chu - Aizawlah mi 909, Lungleiah 232, Saitualah 142, Champhaiah 119, Mamitah 81, Kolasib-ah 86, Lawngtlaiah 51, Hnahthialah 36, Serchhipah 32 leh Siahaah mi paruk an ni.

IDSP record angin, Mizoramah Covid-19 vei 2,00,635 hmuh chhuah a ni tawh a, mipa 94,129 leh hmeichhia 1,06,506 an ni a, mipa aiin hmeichhia 12,377-in an tam zawk. Nimin tlai dar 5 thleng khan mi 1,90,222 (94.81%) chhuahtir an ni tawh a, mi 640 (0.32%) thi tawhin, enkawl mek mi 9,773 (4.87%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,00,635 chu mi 1,000 zelah hripui vei mi 183 an awm ang a ni a; mi 1,00,000 zela Covid-19 vangin mi 58 an thi tawh ang a ni tih sorkar thuchhuakin

a tarlang.

Mizoramah February 15, 2022 thlenga swab sample endik tawh 17,72,201 aṭanga RT-PCR hmanga endik zat percentage chu 20.55 a ni a, RAT hmanga endik zat chu 73.77% a tling.