KHAWTHLIR

Thisen pe

KṬP, Khatla East Branch chuan KṬP Day pualin nimin khan Synod Hospital blood bank-ah thisen unit 30 an pe a, petute mipa 27 leh hmeichhia pathum an ni. KṬP, Siaha Bial pawhin KṬP Day pualin Siaha District Hospital tan thisen unit 26 an pe a, petute mipa 23 leh hmei­chhia pathum an ni.

Hmanrua sem

Lunglei bawrhsap Kulothungan A chuan nimin khan Jai Foundation, New Delhi leh Bhnomika Trust, Chennai-te'n CSR kaltlanga damdawi lam bungrua chi hrang hrang an pek chu Lungleia chief medical officer, medical superintendent leh village task force-te hnenah a sem.

Leitlangpui Rahbi

Lunglei district High Powered Committee (HPC) conference hall-ah nimin khan Lunglei district-a sumdawnna lama ruahmanna neite tana buatsaih, 'Leitlangpui Rahbi 2020-21 Competition-a tel mi 120 zinga mi 23 hnenah winner certificate hlan a ni. Rahbi 2020-21 ah hian project azirin Rs 2,00,000 thleng ṭanpuina dawn theih a ni.

DFO chhuang

ZPM Ṭhalai chuan, February 15, 2022-a Assam aṭanga dan loa Mizorama luta mautak pum 4,900 leh raw-nâl pum 650 sâttu hnam dang pariat mantu Kolasib DFO Margaret Lalramchhani an chhuan thu an tarlang a, "Mizoramah dik leh tlin taka hna thawk a, huaisen taka sual do ṭhin official eng emaw zat kan la nei hi thlamuanthlâk kan ti," an ti.

AR Mini Marathon

Serchhipa hmunpui nei Assam Rifles chuan nimin khan Khawbungah Mini Marathon an buat­saih a, Khawbung naupang eng emaw zat an tel. Mini Marathon hi naupangte'n nunphung dik an neih theih nan leh taksa hrisel ṭha an neih theihna atana buatsaih a ni.