Wine siam/ zawrh phal leh phal loh Cabinet thutlukna siam turin dah a ni

18th February, 2022

Excise & Narcotics department (END) chuan Mizoram Liquor Prohibition (MLP) Rules chu Cabinet ngaihtuah turin an peih ṭêp tawh a, wine siam leh zawrh chungchangah Cabinet-in thutlukna a siam ang.

Tarlan tawh angin, Mizoram sorkarin Mizoram Liquor Prohibition (MLP) Rules zir chiangtu tur committee a din, deputy chief minister Tawnluia kaihhruai chuan wine siam leh zawrh chu khap ṭha an ti a, Cabinet-ah rawtna thlen an rél. Cabinet hnuhnung bera ngaihtuah hman tum ni mah se, MLP Rules peih hman a nih loh avangin ngaihtuah a ni lo.

Wine siam leh zawrh chungchangah hian ràwn an nih angin Mizoram Kohhran Hruaitute Committee leh Central YMA chuan zu lam hrim hrim zawrh ṭha an tih loh thu committee-ah an thlen a ni.

Cabinet hian wine siam phal an remti a nih chuan, a zawrh dan tur leh alcohol tel thei zat turah thutlukna an siam tel a ngai dawn. END chuan Cabinet ṭhutkhawm leh hmasak bera ngaihtuah turin MLP Rules peih hman an tum a, tunah chuan Law & Judicial department-ah pawmpui (vet) turin a awm mek.

Grape chíngtute chuan rawtna awm pakhat, alcohol 5% telh chu ṭha an ti loa, ṭha an tih loh chhan chu alcohol a tlem lutuk chuan wine chu thla ruk vel bak a ṭha thei dawn lo a ni. Alcohol tel tur zata an duhthusam chu 14% a ni a, 11% a nih pawhin wine chu a ṭha rei tho tura ngaih a ni.

MLP Rules ngaihtuahtu committee-ah wine-a alcohol tel tur zata sawi rîk tam ber chu 5%, 11% leh 14% a ni a; Cabinet-in wine siam a remti a nih chuan alcohol tel tur zatah thutlukna an siam nghal ang.

MLP Rules zir chiangtute'n thutlukna an siam hnu, February 4, 2022 khan Champhai leh Hnahlana grape chíngtu pawl hruaitute chuan chief minister Zoramthanga leh deputy chief minister Tawnluia an hmu a; MLP Rules duan mekah wine siam chhuahah alcohol 11% telh phalsak tur leh an wine kawl mekte Mizoram hmun hrang hranga hralhna ngaihtuahpui turin an ngen.

Grape chíngtute sawi danin, an thu thlente chu Chief Minister chuan a lo ngaihtuah tur thu leh sawiho a nih tur thuin a lo chháng a; an thil duhah hlawhtlinna an hmuh ngei an inbeisei a ni.