Minister Robert Romawia'n Union Minister a kâwm

Minister of state Robert Romawia Royte chuan February 16, Nilaini zan khan sorkar laipuia Tourism, Culture leh DoNER minister GK Reddy a hmu a, Tourism Ministry-in Mizoram tana sum instalment pek chhuah tur a la neihte pe chhuak thuai turin a ngen.

Robert Romawia Royte hian GK Reedy chu DoNER hnuaia hmalakna tur thil hrang hrang a sawipui a; a thuphunga sanction tawh, PRASAD scheme pawh pek chhuah vat a nih theih nan project hmunhmate endiktu tur inspection team tir thuai turin a ngen a ni. Union Minister chuan, a theih ang anga bawhzui a tum a sawi.

Minister Robert Romawia hian Union Finance secretary Somanathan leh Economic Affairs secretary Ajay Seth te pawh a kawm a; Finance ministry hnuaia Sports leh Tourism project-te rang zawka sanction a nih theih dan tur a sawipui.

Tourism ministry sum cheng nuai 4,000 chuang hmanga sak tur Chite Convention Centre satu tura ruat WAPCOS hotu RK Agarwal pawh Robert Romawia chuan a hmu a; RK Agarwal chuan, Chite Convention Centre sak hna chu tender tawh a nih thu leh chhànna endik mek a nih thu te, February 2022 chhungin hna ṭan theih an beisei thute a lo hrilh.

Sports minister Robert Romawia Royte hian Youth Affairs and Sports secretary Sujata Chaturvedi pawh kàwmin, Sports ministry-a Mizoram project táng mekte a sawipui. Tribal Affairs Secretary pawh hmuin, Archery Centre of Exellence din dan tur leh Zo Kûtpui leh Mizoram State Games chungchangte a sawipui bawk.

Robert Romawia hi Tourism director V Lalengmawia, Delhi Mizoram House additional resident commissioner Alex V Chawngthu leh Mizoram State Sports Council secretary John Ṭanpuia ten an ṭawiawm a ni.