Serchhipah kuhva check gate thar hawng

Myanmar aṭanga dan loa kuhva tawlh rûk danna atana Mizoram sorkarin Sailiamkawn, Serchhipa check gate a siam thar chu nimin khan Serchhip SDPO Kaste Romalsawma'n a hawng.

Check gate hawngtu Kaste Romalsawma chuan, khawchhak lam aṭanga dan loa tawlh rûk ruihhlo, kuhva leh thil dangte tun hnaiah an man fo tawh tih sawiin, "Hemi do lêt tura check gate mumal tak leh thawktute dah an nih takah phei chuan nasa leh zualin hma kan la dawn a ni," a ti.

Serchhip SDPO chuan, check gate-a duty post an sak theihna tura hma laksaktu Mizoram police hotu te, Serchhip DC leh a huam chhung VC leh Serchhip Dinthar Branch YMA-te chungah an lawm thu a sawi a; dan loa kuhva leh thil dang tawlh rûk donaa thawhhopuiah a sáwm a ni.

Check gate hawnna hun hmanpuitu Central YMA president R Lalngheta chuan, "Duty post ropui leh ṭha tak aiin, Mizoram leh hnam damna thlen thei check gate ni se tih hi YMA-te'n kan duh chu a ni," a ti a; sorkara an ngen pawh check gate changtlung tak aiin, check gate rintlak a nih thu hriatsak turin check gate-a duty tur police-te a chah. Check gate chu police hmel thar tilangtu ni se a duh thu a sawi bawk.

YMA Sub-Headquarters, Serchhip presi-dent Kawlṭhuama pawhin thu sawiin, Serchhip YMA Sub-Hqrs-te'n theihtawp chhuahin police-te an thawhpui tlat dawn thu leh, an tih theih chinah chuan puih an inhuam reng thu a sawi.

Myanmar aṭanga dan loa kuhva tawlh rûk danna atan hian Mizoram sorkar chuan Sairang Sihhmui Zero Point bulah check gate a siam thar bawk a, February 14, 2022 khan police-te an duty ṭan a ni.