PPE ṭhui man sorkarin a pe chhuak

Mizoram sorkar chuan tualchhunga puan ṭhuitute hnena Sep­tember 2021 aṭanga per­sonal protective equip­ment (PPE) a ṭhuitirna man a bat chu nimin khan a pe. PPE ṭhui man hi Commerce & Industries department aṭangin a ṭhuitute hnenah pek a ni.

Vanglaini palai zawh­na chhangin Commerce & Industries hotute chuan, PPE ṭhui man batsakte chu mi 280 vel an nih thu an sawi a, "PPE pakhat hi Rs 150 zelin an ṭhui a, PPE 20 aṭanga 100 inkar ṭhuite an awm avangin an pawisa hlawh zat a inang lo," an ti.

Commerce & Indus­tries hotute chuan, puan ṭhuitute hlawh bakah, tualchhung industry pahnih hnena PPE kaih­hawiha sorkarin pawisa a bat cheng nuai 168 chu nimin khan pek theih turin an kutah a awm thu an sawi.

February 15, 2022 khan PPE ṭhuitu mi eng emaw zat chuan Commerce & Industries minister Dr R Lalthangliana, Health minister ni bawk chu hmuin, PPE an ṭhui man pe thuai turin an ngen a ni. Dr R Lalthangliana chuan, an hlawh tur chu Treasury-ah a awm tawh thu leh January 16, 2022-ah Treasury aṭanga pek chhuah a nih tur thu a lo hrilh.

PPE ṭhuitute chu nimin khan Comme­rce & Industries depart­ment pisa kawtah pung khawmin, an hlawh lak hun an ngaichâng a, chawhnu dar 1-2 vel khan an hlawh tur pek an ni.

PPE ṭhuitute chuan, sorkarin pawisa a pek chhuah hun tura a intiamah a pe nghal mai lo chu an lungawi loh chhan a nih thu Vanglaini an hrilh a, "Rethei tak tak kan nih a, tunah kan ṭhuina hlawh min pe hi kan lawm em em. Chutihrualin, nikum December ni 17 khan pek min tiam a, chumi hnuah Krismas leh kum thar inkarah pek min tiam leh. Pek min tiam aṭanga thla hnih dáwnah keimahni che chhuakin kan nawr a, min pe thei hram," an ti a; an hlawh tur nawr chhuah kher a ngai chu an hriatthiam loh thu an sawi.