Sihhmui Tlawng lei leh NH-44A siam mekah Chak leh ṭha taka thawk turin MLA-in a chah

18th February, 2022

SEDP hnuaia Road & Infrashtructure Develoment Board (RIDB) vice chairman H Lalzirliana, MLA chuan nimin khan Sihhmui bula Tlawng lei siam mek leh NH-44A siam mekte a hmunah a endik a, hna thawktute chu ṭha leh chak taka thawk turin a chah.

H Lalzirliana chuan, Sihhmui Tlawng lei dawhtute chu ṭha tak leh chak taka thawk tura chahin, hun hmasa lamah Tlawng lei siam chu pàmṭùl a nih tawh thu leh lei hman mek a chim tawh avangin thihna hial a thleng tawh tih a sawi a, theihtawp chhuah turin hna thawktute a chah a ni.

Tlawng lei thar tur hi Poddar Infotech Pvt. Ltd-in an dawh a, March 2021-ah hna ṭanin, hna 25% vel an thawk zo tawh a, March 2023-a dawh zawh tura tih a ni. Lei dawh nan cheng vbc. 36.99 ruahman a ni.

NH-44A/108 kawng siam mek a tlawhnaah H Lalzirliana chuan, NH-44A/108 kawngpui chu khawthlang mipui tan mai bakah, Mizoram tan kawngpui pawimawh a nih thu a sawi a; Tripura leh Assam bakah, Bangladesh nen inkalpawhna atana kawngpui pawimawh tur a nih avangin kawng siam hmabak tlém la awm chu fùr thlen hmaa siam zo tur leh chak zawka hna thawh a nih theih nan hmanrua leh thawktu dah belh nghal turin a hrilh.

H Lalzirliana chuan, kawngpui a tlo zawk theih nan a sirah tuihâwk luankawr uluk taka siam turin a chah a; kawng siam chak tum luat avanga ṭha lo taka siam lo tura hrilhin, "A ṭul ang zelin ka enpui zel dawn a ni," a ti a; PWD (Highway) hotute pawh ṭha taka hna vil turin a chah bawk.

NH-44A/108 siam mek hi Dâpchhuah-Dàmpui péng thleng km. 6 vel blacktop loh a la awm a, Dárlâk leh Tuidam inkar km. 4 vel siam loh a la awm bakah, Teirei lei dawh zawh a la ni lo.

Kawng siamtu Ratna Infrastructure hotute chuan, Dâpchhuah-Dampui kawng la siam loh chu kumin ṭhál chhung ngeia siam zawh hman an tum thu leh, hmanrua leh thawktu tam zawk an ngaihtuah zel thu an sawi.

NH-44A (km 11 - 114.618) Lengpui - Mamit - Langkaih (Tripura) kawngpui siam nan Ministry of Road Transport and Highways (MoRTH) chuan kum 2010 khan sum a pe chhuak a, kum 2011-ah hna thawh ṭan a ni. Sum ruahman chu ṭum thum ennawn (revise) a ni tawh a, revised estimate vawi thumna chu December 7, 2021 khan MoRTH hotute'n a thuphungin an pawm a, December 15, 2021-ah sanction approval pek a ni. Kawngpui hi December 31, 2022 ral hmaa siam zawh vek tura tih a ni.