BJP hruaitute'n Governor an kâwm

BJP, Mizoram Pradesh vice president Dr BD Chakma, MLA leh BJP National secretary Delson Notlia te chuan nimin khan Raj Bhavan-ah Governor Dr Hari Babu Kambhampati an hmu a, Siaha district-a harsatnate an sawipui.

Delson Notlia chuan, thla khat chhunga Mara Autonomous District Council (MADC) huam chhunga khaw 46 a tlawhna report Governor hnenah pein, Siaha district harsatnate a sawipui a; sorkar laipui scheme hrang hrang chungchang a sawipui bakah, State Bank of India branch leh ATM booth dah belh a nih theih nan hma lakpui turin a ngen.

Governor chuan, Siaha district-ah sorkar laipui scheme hrang hrang duh anga mipuiin an hre tâwk lo chu pawi a tih thu sawiin, central scheme chungchangah Mizorama a kaihhnawih department hotute a sawipui tawh thu a sawi a; SBI branch leh ATM booth dah belh turin SBI hotute a ngen tawh thu a sawi bawk.

Dr BD Chakma chuan, Mizoram sorkarin sum leh paia inrenchem a duh avangin sorkar motor a titlém a, POL-te pawh a tihtlem lai leh sorkar hnathawk lak loh tur a tih laiin, CADC-a MNF kaihhruai sorkarin hna ruak ṭhenkhat leh hna thar siam chawpin appointment an pek chhuah thu a sawi a; hna lakna atan interview an neih mekte chu ṭha lo a tih thu Governor a hrilh a ni.