Supply kudam leh quarters thar hawng

Food, Civil Supplies & Consumer Affairs (FCSCA) minister K Lalrinliana chuan nimin khan Hmuifang leh Chhipphir khuaa NABARD loan hmanga Supply kudam leh quarters sak thar a hawng. Minister chuan, hmun tam takah kawng sial mek a nih avangin kudam 70 velah kumin fûr daih buhfai dah tum a nih thu a sawi.

K Lalrinliana chuan, FCSCA department a enkawl tirhin kudam tam tak chhe tawh lutuk leh a hul ṭhat loh vanga buhfai chhe ṭhin a ngaimawh thu a sawi a, "Kudam sak ṭhat ngai 65 zinga 10 sakna tur chu kum 2019 khan sorkar laipui aṭangin hmuh a ni a, a bak 21 chu NABARD loan hmangin sak mek a ni," a ti.

Mizoram hmun tam takah kawng sial mek a nih thu sawiin Minister chuan, "Hei vang hian kum danga kudam 50 vela fûr daih tur buhfai chhêk khâwl ṭhin chu kuminah chuan kudam 70 velah monsoon stock dah a ngai dawn," a ti a; buhfaite chu chhêk mek a nih thu a sawi.

Hmuifanga Supply centre-ah hian buhfai metric ton 200 dah theihna kudam bakah, storekeeper leh chowkidar quarters leh toilet block sak nan cheng nuai 140 vel hman a ni a; Chhipphira Supply centre-ah pawh cheng nuai 156 vel sêngin sak a ni.

Hawnna inkhawmah hian Aizawl South-III bialtu MLA Dr F Lalnunmawia leh Lunglei North bialtu Dr Vanlalṭanpuia te, FCSCA director Ramdinliani leh sorkar leh khawtlang hruaitute an tel.

FCSCA department hian Mizoramah centre 121 a nei a, chu'ng zinga 21 chu Babie Construction & Consultancy Services-in cheng vbc. 39.61 séngin an sa ṭha mek a, a tam zawk chu March 2022 ral hmaa sak zawh beisei a ni.