Mizorama Meitei mi pahnih tualthihna Mizoram sorkarin CBI chhuitir a remti - World Meetei Council

Tun hnaia Mizorama Meitei mi pahnih tualthihna chungchang chu Mizoram sorkar hotute'n Central Bureau of Investigation (CBI) chhuitir an remti niin World Meetei Council (WMC) chuan an tarlang.

Mizoram police hotute aṭanga thu dawn danin, Keisham Prabin Singh leh Namram Nipen Singh te hi truck pakhat enkawltu an ni a, January 31, 2022 khan Buichali lei bulah handyman zawk Namram Nipen chuan driver Keisham Prabin chu a that a ni. Namram Nipen chu a tlanchhia a, a tuk February 1-ah man a ni a, Central Jail-ah dah a ni. Jail-ah hian mi dang kut a thlak avangin pindan pakhatah amahin dah a ni a, pindan chhungah hian February 9, 2022 zing khan inâwk hluma hmuh a ni.

Police hotute chuan, jail-ah Namram Nipen inâwk hluma hmuh a nih tirh lamah Dholai velah kawngpui dan a ni a, a hnu lawkah an dang zui lo niin an sawi.

WMC-in nimina press release an siama an tarlan danin, Mizoramah January 31, 2022 khan Keisham Prabin Singha chu thah a ni a, February 8, 2022 khan Namram Nipen Singha pawh thah a ni leh bawk. An pahnih hian Assam-a Cachar district mi leh sa an ni a, tualthihna duh lohna lantir nan WMC chuan Silchar-Aizawl kawngpui an dang a ni.

Thil thleng chungchangah hian February 15, 2022 khan WMC hruaitute leh Mizoram sorkar aiawhte chu Delhi Mizoram House-ah an inbia a, buaina chinfel dan tur an sawiho. Inbiaknaah hian Mizoram sorkar aiawhin OSD to CM Rosangzuala a tel a, WMC aṭangin WMC Delhi unit vice president Mayanglambam Diana leh a thawhpuite an tel.

WMC tarlan danin, hmalak zui dan turah inremna an siam a, hnam leh hnam, chi leh chi inkarah buaina a awm loh nan leh inaunauna ṭha a awm theih nan hmalak an remti bawk.

Rosangzuala chuan WMC hruaitute chu Aizawlah zin a, Meitei mi pahnih thihna chungchangah Chief Minister leh Home Minister sawipui turin a sáwm nghal a ni.

WMC press release-ah hian an general secretary Yambem Arun Meetei chuan hming a ziak a ni.