Omicron hmuh a nih tawh avangin kalphung thara kal a ṭul maithei - Dr ZR Thiamsanga

Covid-19 Medical Operational Team chairman Dr ZR Thiamsanga, MLA chuan, Mizoramah Covid-19 chi thar Omicron vei an awm tih finfiah a nih tawh avangin kalphung thara kal a ṭul mai theih thu a sawi.

Vanglaini palai zawhna chhangin Dr ZR Thiamsanga chuan, Omircon chu Covid-19 léng hmasate aṭangin a danglam deuh thu a sawi a, "A natna a serious lo deuh zawk niin a lang a, mahse, inkài chhàwn a awlsam hle thung. Symptom neih hun chhung pawh Covid-19 pangngai ai chuan a rei lo deuh," a ti.

Dr ZR Thiamsanga chuan, hripui vei enkawl dan leh chhuah zalen dante tihdanglam a ngaih mai theih thu sawiin, "Hemi chungchangah hian expert team din a ni a, anni'n rawtna an neih hunah ngaihtuah a ṭul ang," a ti a; Omicron chungchangah hmun danga an tih dante zir chian ve zel a nih thu a sawi.

Tarlan tawh angin, National Institute of Biomedical Genomics, Kalyani, West Bengal chuan Mizoram aṭanga swab sample thawn zinga 62 chu Omicron a ni tih an finfiah a, February 14, 2022 khan Mizoram sorkar a rawn hriattir a ni.