KHAWTHLIR

Councillor-in pe

AMC Ward XVII councillor David Zohmangaiha chuan nimin khan a bial chhung Upper Republic-a hmeithai in sak ṭhat nan a ward fund aṭangin Rs 1,00,000 a pe. David Zohmangaiha chuan, "Tunlaiah ṭhuthmun aṭanga mi sawisel an tam em em a, chutiang a nih laia mi harsa ṭanpui nana khawtlang hruaitute'n ngaihtuahna an séng hi a lawmawm. Mi dang ṭanpui kawngah kawhhmuhtu nih zel i tum ang u," a ti.

Lehkhabu tlangzarh

Human Resources Development Board vice chairman L Thangmawia, MLA chuan nimin khan a pisaah Mizo Academy of Letters, Mizo Writer’s Association, Mizo Grammar Society leh Mizo Poetry Society hruaitute nen an inkawm. L Thangmawia chuan, Mizo Language Development Board (Draft) Bill, 2022 chu February 22, 2022 aṭanga Assembly session neih turah put luh a nih dawn thu a sawi. MLA hian Darchuailova Renthlei ziah 'Vankhama: A Master of Diction' leh 'Vankhama: Thulehthliah Thiam' tih lehkhabu a tlangzarh nghal a ni.

Tui lâkna hawng

Ni zung chakna hmanga tui lâkna, Ralvawng Water Supply Scheme chu nimin khan Lunglei HPC vice chairman Lawmawma Tochhawng, MLA-in a hawng. Tui lakna hi NABARD sum nuai 270 sénga siam a ni a, mi 489 cháwm thei tura duan niin, kum 2049 thleng hman theih tura ngaih a ni.

SVEEP campaign

Nimin khan Khawzawl khawpui hmun lûn lai - Taidawnkawn, Zaingen Veng leh Khawzawl Vengtharahte election chungchang inzirtirna, Systematic Voters Education and Electoral Participation (SVEEP) street campaign neih a ni a; Khawzawl district election officer CC Lalchhuangkima, bawrhsap ni bawkin a hmanpui.

Sial in hawng

Animal Husbandry & Veterinary director Dr H Laltlanmawia chuan nimin khan Ruantlang khuaa Sabual ramah FOCUS project kaltlanga sial in leh tuikhur sak thar a hawng. Ruantlangah hian chhungkua 16-in sial 60 vel an vulh mek a ni.