Provisional employee-te'n A huhoin chawlh la ṭan

Mizoram sorkar hnuaia a nghet loa thawk, Pro­visional Employee's Asso­ciation of Mizoram (PEAM) chuan Mizoram sorkarin an thil phût a tih­puitlin loh avanga lungawi loh lantir nan nimin khan a huhoin chawlh an la ṭan a; mass casual leave an lak hi vawiin­ah an chhunzawm dawn.

Additional chief secretary JC Ramthanga chuan nimin khan PEAM hruaitute chu léngah sáwmin, an lungawi lohna lantir titàwp turin a ngen. PEAM hruaitute erawh chuan Additional CS aṭanga an beisei ang thu an dawn loh avangin, ruahmanna an lo siam tawh angin vawiinah chawlh an la chhunzawm dawn a ni.

Vanglaini palai zawhna chhangin PEAM hruaitute chuan, an thil phûtah sorkar aṭangin thu lawmawm an la dawng lo tih an sawi a, "Ni hnih chawlh kan lak chhunga thu lawmawm kan hmu lo a nih chuan tiam chin awm loa lungawi lohna lantir kan tum. Kan lungawi lohna lantir zel dan tur erawh kan la sawi thei lo," an ti.

PEAM hian sorkara a ngheta an luh ve theihna tur austerity measure hmanga Mizoram sor­karin May 25, 2020 aṭanga a tihtàwp sût an phût a, New Pension Scheme hnuaia inziah luh ve an phût bawk.