Hortoki - Meidum kawng laih turah Kawng hlui aia thuia siam tum a ni ; KR Construction thawh tur a tam ber

Hortoki leh Meidum inkar kawng zauh hna thawh turah kawng hlui aia thui zawkin kawng sial tum a ni a, contractor-te chuan hnathawh tumin an kháwl an dah lut tawh. Kawng laih zauh tur hi phase rukah ṭhen niin, thawk turin mi pali thlan an ni a, tunlaia sawi hlawh tak Kamrul Laskar Uddin-a ta KR Construction, Ṭhuampui thawh tur a tam ber.

Meidum leh Hortoki inkar kawng zauh turah hian Uvai tlang (Hortoki ram chhung) hêl turin survey a ni a, hna thawk tura thlan mi pali zinga pathum chu a hmunah an awm tawh.

Hetih lai hian, PWD hotute chuan Uvai tlang hêl a ṭul em tih enfiah nawn leh an tum a; Uvai tlang hêl a nih chuan kawng chu km. 26 a ni dawn a, Uvai tlang hêl loa kawng awm sa laih zauh a nih chuan km. 3.75-in a tawi zawk dawn a ni.

Kawng tam zawk chu kawng hlui awmna, kum 1980 hma lama lirthei kal theih tura laih tawh a ni a, tun hma deuha PWD record-ah chuan kawng chu Kawnpui-Bairabi-Gharmura-Hailakandi (KBGH) Road tih a ni ṭhin a, Hortoki-Meidum inkar kal nana la hman mek a ni.

Package dangah Uvai tlang kaltlanga kawng hlui kal mek chu paih turin tlang aṭanga tlak lamah her liamtir tum a ni a; chutiang tur chuan contractor-te'n hna thawh tumin an khawl an dah lut tawh.

Hortoki aṭanga thu dawnin, Uvai tlang hêla kawng thar laih turah hian mimal huan leh thlai tam tak tihchhiat tur a awm a; chutih laiin, kawng thar turah hian mimal ram leh thlai tihchhiat a nih pawhin zangnadawmna pek theih a ni dawn lo tih PWD lam chuan an sawi. Hei vang hian kawng hlui awm sa chu ṭha zawka siam theih beiseiin a hmunah ennawn leh an tum a ni.

Kawng hlui chu ONGC hna thawhna kawng tur a nih avangin zangnadawmna awm thei tur zawng zawng chu pek vek tawh a ni a; chuvang chuan dan anga zangnadawmna pek leh tur a awm tawh lo nia thu dawn a ni.

Kawng zauh hna thawk tura thlante chu KR Construction, Ṭhuampui; Zoramchhana, Electric Veng, Aizawl; Lalthanṭhuami, Chawn­pui, Aizawl leh V Lalbiakzama te an ni.