Mizoram hi ram nuamah I siam ang u - Lalsawta

Mizoram Pradesh Congress Committee (MPCC) hruaitute chuan nimin khan Kolasib Press Club-ah thuthar thehdarhtute an kâwm a; an president Lalsawta chuan, Mizoram ram nuama siam turin Mizo mipui a sáwm.

Lalsawta chuan, Mizoramin sorkar ṭha a mamawhna a san thu sawiin, "Heti ringawt hi chuan kal zelna chi a ni tawh lo, sorkar ṭha kan siam thuai a ngai. Pathianin duhsak takin pi leh pu aṭangin ram ṭha, mipui ṭha tak min pe a ni. He rama sorkar ṭha siam tur hian chhuanlam tur reng reng kan neih kan hre lo. Vawiina kan awm ang lo deuha hma sawn a, mahni ram chapopui ve theia awm kan duh," a ti.

Mizoram dinhmun dik tak sawi chu sorkar demna leh beihna anga ngai an awm thei tih sawiin Lalsawta chuan, "Mahse, kan sorkar hi nu leh pa atana rin ngam harsa khawpa a petek nasa tawh hi a pawi. Mizoram mipui hian sorkar ṭha kan duh vek a ni," a ti a, sorkar ṭhaah chuan thil ṭha tih a awlsam a, thil sual tih a harsa niin a sawi.

MPCC President chuan, tuna Mizoram din­hmunah thil sual tih a awlsam tih sawiin, "Thil ṭha tih a theih loh tluk a ni. Vawiina kan sorkar­ah chuan thil sual ti an inhàwr khawm a, an inlár chhuak ngam. Mipui mitmei veng loin, ṭantu an la zawng ngam zawk hi a lungchhiatthlak a ni," a ti.

Lalsawta chuan, an kal tumna, an kalna tur kawhhmuh thei, tuna sorkar ang ni lo, sorkar ṭha Mizoramin a tlin nia sawiin, “Sorkar hrim hrim kan tum a ni lo, kan tu leh fate hlan chhâwn atan sorkar ṭha kan siam dawn. Chu chu kan tum ber a ni,” a ti a; ṭanhona a awm phawt chuan Mizoram chu la thlak danglam theih a nih thu a sawi.

Mi ṭha báwm an siam dawn loh thu sawiin, “Ṭhat loh theih lohna báwm erawh a kalphung avangin kan siam dawn. Minister, MLA leh party hruaitute pawh chu báwm chuan a khung vek dawn. Ṭhat loh theih lohna báwmah chuan tu mah an duhâm dawn lo a, mahni aia ram dinchhuah duh zawk vek an ni ang. Ram aia mahni dinchhuah tum zawkte tan hmun a awm dawn lo,” a ti.

Congress party President chuan, “Ram tana thawkho turin kan sáwm che u. Chhan hrang hrang avanga Congress party chhuahsan tawhte lo lêt u la, party danga mi te, party-a nihna nei lote pawh Mizoram tana sorkar ṭha siam turin lo tel u la, i thawkho ang u,” a ti a, ram nuam siam turin Mizoram mipui a sáwm.

Thuthar thehdarhtute an kawm zawhah MPCC hruaitute chuan Kolasib Diakkawnah vantlang inkhawm an buatsaih a, president Lalsawta bakah, vice president Lal Thanzara leh treasurer Zodintluanga Ralte ten thu an sawi a ni.