SHC-ah no confidence motion a lut OSD to CM a inrawlh ngeiin kan hria - Hmar Peoples Convention

Hmar Peoples Convention (HPC) hruaitute chuan, Sinlung Hills Council (SHC)-a MNF member pathum leh independent member pathumte'n SHC sorkar rin tâwk lohna, no confidence motion an put luh thu an sawi a, "OSD to CM Rosangzuala a inrawlh ngeiin kan hria," an ti.

HPC hruaitute chuan nimin khan SHC pisaah thuthar thehdarhtute an kâwm a; HPC adviser Remruata Varte chuan, SHC-ah MNF leh HPC thawk dunin, seat 12-ah seat 10 neiin sorkarna an chan thu a sawi a, "Seat panga ve ve kan la a, kan chanvo tur kan insem. HPC lam chuan Chief Executive Member (CEM), Executive Member (EM) pakhat leh Deputy Chairman post kan chang. CEM duh tâwk lohna avangin ṭum khat HPC insiamremin, CEM kan thlak a ni," a ti a, MNF nen lungrual takin harsatna awm loa an thawhho theih thu a sawi.

HPC Adviser chuan, Feb­ruary 16, 2022 khan MNF member pathum leh indepen­dent member pathumin no confidence motion an put luh thu sawiin, "MNF member-te hian MNF Gen.Hqrs hruaitute hriatpui loin thil an ti a, anni pawh an rilru a na hle. Chalfilh Bialtu MLA-in chairman chu special session ko turin a nawr a, hetianga a rawn inrawlh hi ṭha kan ti lo. Tun hnuah chuan inrawlh tawh lo turin kan duh," a ti.

No confidence motion chungchangah hian OSD to CM Rosangzuala a inrawlh ngeia an hriat thu sawiin Remruata Varte chuan, “No confidence motion chungchangah hian ramhnuai rim namte kaltlangin Rosangzuala leh a thehluttute hi an inbe ngeiin kan hria a, pawi kan ti hle,” a ti a; HPC chuan Rosangzuala chu SHC-ah inrawlh tawh lo tura an ngen leh hriattir nghal thu a sawi.

HPC hruaitute chuan, special session koh a nih dawn chuan an headquarters Sakawrdaiah ngei session neih an phût tih sawiin, “Sakawrdaiah hian live telecast ngeia session neih kan duh. Chutah chuan, CEM hmasain a thil tih dik lohte chiang taka sawi chhuah kan duh,” an ti.

SHC chu thisen fara sual chhuah a nih thu sawiin HPC hruaitute chuan, “Rambuai nih kan peih tawh loh avangin inremna siam a ni. No confidence motion hi kaltlangpui zel an tum chuan mipui movement kan siam dawn. Inremna ṭha tak neih ṭha kan ti,” an ti a; sum leh pai leh nihna duhte’n SHC chu duh duha an tih kual an remtih loh thu an sawi.

Zawhna chhangin HPC hruaitute chuan, Sakawrdaiah an headquarters pisa tur cheng vbc. 3.33 sénga sak mek a nih thu an sawi a, “PWD-in restricted tender hmangin tunlaia lâr tak Kamrul-a a thawhtir. SHC leh zela a rawn inrawlh hi ṭha kan ti lo hle. Kamrul-a hian hna hi a hralh chhawng a nih hmel a, a hna hi a la rawn hmu kher lo mai thei,” an ti.

Hetihlai hian nimin chhun dar 1 khan HPC member-te tel loin no confidence motion chungchang hi Dy. Chairman kaihhruaina hnuaiah ngaihtuah niin, pawm a ni.