KHAWTHLIR
Thisen pe
Nimin khan Pentecostal Youth Department (NEI), Tlangnuam chuan an kum 40-na pualin Civil Hospital, Aizawl tan thisen unit 29 an pe a, petute mipa 19 leh hmeichhia 10 an ni. Kolasib District Court-a thawkte pawhin District Hospital, Kolasib-ah thisen unit 14 an pe a, petute mipa 11 leh hmeichhia pathum an ni.
CM-in enfiah
Nimin zing khan chief minister Zoramthanga chuan DIET Complex, Chaltlanga PWD hnathawh mek a hmunah a enfiah. CM ṭawiawmtu PWD hotute chuan DIET Complex panna kawng zauh leh lak mar hna thawh mek chu ṭha taka kalpui a nih thu an sawi.
Siaha DEO & RO
State Election Commission chuan Mara Autonomous District Council inthlan vawi 12-na awm tur atan Siaha DC chu district election officer leh returning officer atan a ruat. Additional DC chu assistant returning officer atan a ruat bawk.
Covid-19 vangin 641 thi tawh
Nimin khan tlai dar 5 thlengin Mizoramah Covid-19 vangin mi pakhat a thi. Mizoramah hripui vangin mi 641 an thi tawh a, kumin February thla bikah mi 31 an thi tawh. Nimin chawhma dar 10:20 khan Ringliani (82), Saichal, Saitual district chu hripui vangin an inah a thi. Covid-19 positive a ni tih February 4, 2022 khan hmuh chhuah a ni a, in lamah an inenkawl a ni.
Minister-in hawng
Land Revenue & Settlement minister Lalruatkima chuan nimin khan Kolasib IPR conference hall-ah Kolasib Sub-Registrar pisaa hman tur, huan, lo, ram neitu inthlakna awlsam leh felfai zawka ziah fel leh chhinchhiahna tur National Generic Documentation System
a hawng.