Covid-19 vei hmuh zat a tlahniam hret hret

February 17, Ningani khan Mizoramah Covid-19 vei mi 1,119 hmuh chhuah a ni a, a záwnin ni thum chhung positive hmuh zat a tlahniam tawh. Positivity rate 22.01% a ni a, a tlahniam hret. Nimin khan hripui vei dam tawh mi 1,823 chhuahtir an ni a, Covid-19 vei mi pakhat a thi.

Covid-19 vei Ningania hmuh tharte chu mipa 464 leh hmeichhia 655 an ni a; RT-PCR laboratory-a hmuh chhuah 198, TrueNAT hmanga hmuh 40, RAT hmanga hmuh 862 leh FIA hmanga hmuh 19 an ni. February thla chhungin positive mi 28,303 hmuh a ni tawh.

Mizorama district 11 zinga district 10-ah swab sample endik niin, positivity rate 10% chung lam vek a ni a, district pangaah 20% chung lam niin, district pathumah 30% chung lam a ni a, Champhai district-ah 45.48% a ni. Kolasib district-ah sample endik a ni lo a, a záwnin ni hnih chhung sample endik a awm tawh lo.

February 17-a Mizorama positivity rate chu 22.01% a ni a, tlahniam hret mah se, ni 27 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni.

Nimin tlai dar 5 thleng khan hripui vei dam tawh mi 1,823 chhuahtir an ni a; district tina chhuahtir zat chu - Aizawlah mi 981, Lungleiah 311, Mamitah 109, Champhaiah 97, Serchhipah 79, Hnahthialah 64, Siahaah 57, Lawngtlaiah 45, Saitualah 45 leh Kolasib-ah mi 35 an ni.

IDSP record angin, Mizoramah Covid-19 vei 2,03,325 hmuh chhuah a ni tawh a, mipa 95,342 leh hmeichhia 1,07,983 an ni a, mipa aiin hmeichhia 12,641-in an tam zawk. Nimin tlai dar 5 thleng khan mi 1,93,916 (95.37%) chhuahtir an ni tawh a, mi 641 (0.32%) thi tawhin, enkawl mek mi 8,768 (4.31%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,03,325 chu mi 1,000 zelah hripui vei mi 185 an awm ang a ni a; mi 1,00,000 zela Covid-19 vangin mi 58 an thi tawh ang a ni tih sorkar thuchhuakin a tarlang.

Mizoramah February 17, 2022 thlenga swab sample endik tawh 17,83,366 aṭanga positivity rate chu 11.40% a ni a; RT-PCR hmanga endik zat percentage chu 20.53 a ni a, RAT hmanga endik zat chu 73.79% a tling.