Kamrul-a zawng turin MSU-in an chah

Mizo Students Union (MSU) General Headquarters chuan, Kamlova Chhangte inti Kamrul Laskar Uddin chu hun tiam chhunga a schedule tribe certificate sorkara a pek let (surrender) loh avangin an huam chhung ṭheuha Kamrul-a zawng turin hmun hrang hranga MSU-te an hriattir.

MSU Gen.Hqrs. thuchhuah chuan, February 16, 2022-a press release an siam tawh angin, Kamrul Laskar Uddin chu February 18, 2022 ral hmaa a tribal certificate sorkara pe lêt tura an tih thu a tarlang a, “Sorkarah a surrender duh tâk loh avangin Kamrul Laskar hi zawn tur a ni. MSU regional headquarters, district headquarters, headquarters, sub-headquarters, joint headquarters leh branch tinte’n kan huam chhung ṭheuhah Kamrul Laskar (Kamlova Chhangte inti) zawn hna lo thawk turin kan inhriattir e,” a ti.

MSU Gen.Hqrs, Aizawl aṭanga Kamrul Laskar zawn hna thawk turte chu vawiin February 19, Inrinni chawhma dar 10-ah MSU Pisapui, Treasury Square-ah kal turin an inchah a; Kamrul Laskar awmna hria chu MSU General Secretary (phone 8014146640) leh Assistant General Secretary (phone 8413834464)-ahte hriattir turin Mizoram mipui an ngen bawk.