FMGEW-in badge dum belh an ṭhulh

Federation of Mizoram Government Employees and Workers (FMGEW)-in an thil phûtah sorkarin hma a lak avangin February 21-25, 2022 chhunga badge dum bel an tum chu an ṭhulh thu nimin khan an puang.

FMGEW hruaitute chu nimin khan an ṭhukhawm a, an thil phût chungchanga chief minister Zoramthanga’n hma a lak dan leh February 21-25 chhunga badge dum bel an tum ṭhulh tura a ngenna chungchang an ngaihtuah a ni.

FMGEW chuan, “Sorkarin kan ngennate min ngaih pawimawhsak avang leh tihhlawhtlin chhoh zel a tum avangin February 21-25, 2022 chhunga badge dum bel tura kan lo rèl tawh chu ṭhulh rih tur a ni a, March 1, 2022-a General Council Meeting tur pawh ṭhulh rih tur a ni e,” an ti.

Sorkar aṭanga FMGEW thu dawn
1. March 1, 2022 aṭangin sorkar hnathawkte dearness allowance (DA) leh pensioner-te dearness relief (DR) chu 17% aṭangin 28%-ah tihsan a ni ang. Financial year tharah a rang thei angin 31%-ah tihsan leh tum a ni ang a, DA pung leh zel tur pawh ngaih pawimawh zel a ni ang.
2. Sorkar hnathawkte hlawh chu a hun takah pek tum zel a ni ang.
3. Pensioner-te retirement benefit chu sorkarin a theih angin a chingfel zel ang a, pensioner-te hamṭhatna hmuh turte pawh ngaih pawimawh zel a ni ang.