Zira'n MLA aṭanga bânna a thehlut MNF ka zawm dawn - R Lalzirliana

Home minister leh Mizoram Pradesh Congress Committee (MPCC) vice president hlui R Lalzirliana chuan nimin khan Speaker hnenah Member of Legislative Assembly (MLA) aṭanga bànna a thehlut. R Lalzirliana chuan, MNF a zawm tur thu leh kumina Assembly inthlanah a din leh dawn thu a sawi.

R Lalzirliana hian MLA aṭanga bânna hi Assembly speaker Hiphei leh deputy speaker R Lalrinawma te an awm loh avangin, Assembly secretary SR Zokhuma hnenah a thehlut a ni. SR Zokhuma sawi danin, MLA aṭanga bànna hi Speaker bakin a pawm thei lo a, Speaker-in phalna a pek chuan Deputy Speaker-in a pawm thei bawk.

Bànna a thehlut hnua thuthar theh­darhtute'n bànna a thehluh chhan an zawhna chhangin R Lalzirliana chuan, "November 28, 2018-ah MLA inthlan atan vote kan thlak mai dawn a, ka bial mipuite'n candidate inang tlangin min en se, sorkarah nihna nei bik loa awm ka duh. Ka bial mipuite'n mi ṭha tak an thlan chhuah theihna atan MLA aṭangin ka báng a ni," a ti.

R Lalzirliana chuan MNF party a zawm dawn thu sawiin, "Pathian leh kan ram tana titu, thisen chhuak hiala ram leh hnam tana beitu MNF ka zawm dawn," a ti a; MNF chu a narâna 'Pathian nung' tih sawitute an nih ve loh thu a sawi.

MPCC-in an MLA candidate turte an puan chungchangah MPCC Vice President hlui chuan, "An tan tlin theihna chance ka hmu lo, an in set hlum ni berah ka ngai. MLA ni lai candidate chang lote an lungawi loin ka hria," a ti.

Vanglaini palai zawhna chhangin R Lalzirliana chuan, kumina Mizoram inthlanpuiah candidate a nih leh dawn thu a sawi a; candidate ni tura MNF-a lut a nih thu a sawi rualin, a dinna bial tur erawh a la sawi theih loh thu leh, hruaitute thu a nih thu a sawi thung. MNF sorkart ta se, Cabinet minister offer a awm leh awm loh zawhna chu, "Kan hotupain Thawhṭanni (October 15)-ah a la sawi ang chu," tiin a chháng.

R Lalzirliana hi Indian National Congress (INC) ticket-in Saitual bial, tuna Ṭawi bial ni taah kum 1998 inthlanah MLA atana thlan tlin a ni a, INC ticket vek hian a zawnin kum 2003, 2008 leh 2013-ahte thlan tlin leh a ni.

Tuna Mizoram State Legislative Assembly term ding mek, a term pasarihnaah hian member 40 an awm ṭhin a, mahse, Tuichang bialtu Lalrinliana Sailo-in bànna a thehluh avangin member 39 an awm mek a, R Lalzirliana bànna hi Speaker-in a pawm chuan MLA 38 chiah an awm dawn ta a ni.