Voluntary Blood Donation Day hmang

Champhai District Hospital, Champhai College leh Asso­ciation for Voluntary Blood Donation (AVBD) Champhai Branch huaihawtin nimin khan Champhai College auditorium-ah National Voluntary Blood Donation Day hman a ni a; blood donation camp huaihawt nghal niin, mi 85-in thisen an pe.

National Voluntary Blood Donation Day hmanna inkhawm hi Champhai AVBD president Dr Zatluanga'n a kaihruai a, DIET principal RL Thianghlima khuallian a ni. Mizoram leh Champhai district bika thisen pek dinhmun an tarlang a; zaithiamte an zai bawk.

Inkhawm zawhan thisen pek rûnpui huaihawt nghal a ni a; Champhai College NSS volunteer-te'n thisen unit 85 an pe a, a petute mipa 41 leh hmeichhia 44 an ni. Nimina thisen pek nen hian, Champhai District Hospital blood bank-a kum 2018-19 chhunga thisen pek tawh zinga 95% chu a thlawna pek, voluntary donation a ni.

National Voluntary Blood Donation Day hi October 1 a ni a, district dangah chuan Octo­ber 1-ah hman a nih laiin, Champhaiah hian harsatna a awm avangin hun remchang hmasa, niminah khan an hmang a ni.