SC-in neih inang inkawp a phal thu-ah MKHC-in an duh loh thu thlen an tum

Mizorama kohhran hrang hrangte intêl­khawmna, Mizoram Koh­hran Hruaitute Committee (MKHC) chuan, Supreme Court-in tun hnaia neih inang inkawp khapna dan, Indian Penal Code (IPC) Section 377) a ṭhiah chu an duh lo a, an duh loh thu India President leh Prime Minister hnenah thlen an tum.

MKHC secretary Rev. R Lalrinsanga'n Vanglaini palai zawhna chhanga a sawi danin, Supreme Court order chungchang hi MKHC meetin-ah an ngaihtuah tawh a; an duh loh thu ziaka tarlangin (representation siamin) President leh Prime Minister hnena thehluh an rèl bakah, chiang leh zuala zirchian an rel a ni.

Rev. R Lalrinsanga chuan, Supreme Court thutlukna, neih inangte inkawp leh inneih phalsak chu Pathian thu nen a inkalh tlat tih sawiin, "Kan Bible thu kalh tlat a ni a, keini Kristiante tan chuan a dik lo a, pawm theih a ni lo," a ti.

Indian Penal Code Section 377-ah chuan, mahni anpui kawp a, mipat hmeichhiatna hman chu hrem theih a nih thu a chuang a; IPC 377 hi LGBTQ (lesbian, gay, bisexual, transgender)-te chuan Supreme Court-ah an khing a ni. India rama court sang ber, Supreme Court chuan September 6, 2018 khan order tichhuakin, IPC 377 chu Indian Constitution kalhah ngaiin a ṭhiat a ni.

IPC 377 hlihna tura thu­tlukna siamtu hi Supreme Court Consti­tutional Bench a ni a; chutah chuan Chief Justice of India (CJI) Justice Dipak Misra bakah judge dang pali - Justice RF Nariman, Justice AM Khanwilkar, Justice DY Chandrachud leh Justice Indu Malhotra te an awm a ni.