Court-in naupang khuaikhemtu Kum 18 jail-a táng turin a hrem

Hmeichhe naupang khuaikhemtu Lalventhanga, Biate chu October 11, Ningani khan Champhai District Court-a special judge R Vanlalena chuan kum 18 chhung jail-a táng tur leh Rs. 5,000 chawi turin a hrem.

Court order-a tarlan a nih danin, Lalventhanga hian February 26, 2015 khan hmeichhe naupang pakhat, an chenna in piah deuha infiam chu sweet pekah thlêmin, hmeichhe naupang dangte nen an inah hruai lut a; hmeichhe naupang dangte chu páwna a chhuahtir hnuah naupang pakhat chu bedroom-ah hruai lutin a khawih a, hmeichhe naupang serhah mipa chi doctor-te'n an hmu a ni.

He thil thleng chungchang hi Champhai Police-te'n an chhui zui a, Champhai District Court chuan police-te thil hmuh chhuah leh thuhretute thusawi a ngaihthlak hnuah Lalventhanga chu kum 18 chhung táng tur leh Rs. 5,000 chawi turin a hrem ta a ni. Rs. 5,000 hi a pek loh chuan thla hnih dang a tàn belh ang.