KHAWTHLIR
Mental Health Day
Volunteers for Community Mental Health (VOLCOMH) bultumin nimin khan Synod Conference Centre-ah World Mental Health Day hman a ni a, higher secondary school pasarih aṭangin zirlai ṭhahnem tak an tel. World Mental Health Day hi October 10 a ni a, Mizoramah chuan nimin khan hman niin, thupui chu 'Young people and mental health in changing world' tih a ni.
Thisen pe
Vestige company hnuaia Heart to Heart Foundation chuan October 11, Ningani khan Khatlaa an training hall-ah blood donation camp an huaihawt a, Synod Hospital tan thisen unit 18 pein, a petute mipa 13 leh hmeichhia panga an ni.
CEO thupuangtu
Election Commission of India thuchhuak angin, Mizoram State Assembly inthlanpui neih tur chungchanga media kaihhnawih thila Chief Electoral Officer's office thupuangtu atan additional CEO Lalzarmawii, IAS ruat a ni.
Excise report
Excise & Narcotics department chuan September 2018 chhung khan zu zuar 104 leh zu rûi mi 28 an man a; rakzu litre 8512.6, zu bilh lai litre 11,757, sap zu ûm puitling 193 leh a loose pathum bakah, zu kaihhnawihah lirthei pariat an man bawk.
Loan pe chhuak
Mizoram Rural Livelihoods Mission (MzSRLM), Ngopa RD Block leh Mizoram Rural Bank (MRB) Ngopa Branch-te chuan nimin khan Ngopaah self help group (SHG)-te tana a hlawma bank loan pek chhuah rûnpui, Credit Camp an buatsaih a, Ngopaa SHG 25 hnenah loan Rs. 1,00,000 ṭheuh pek a ni.
c-VIGIL zirho
Nimin khan Mamit DC Vanlalngaihsaka hoin Mamit DC conference hall-ah cVIGIL chungchang zirho a ni. cVIGIL hi vigilant citizen tihna niin, Election Commission of India-in inthlan atana android mobile phone application a siam a ni a, India khua leh tui tu pawhin Model Code of Conduct (MCC) bawhchhiatna a awmin, a video/picture-te awlsam takin district control room-ah an report thei dawn a ni.