Min kahna aia naiin kan khingpuite Kan kap let zel ang - Lal Thanhawla
Congress party president Lal Thanhawla chuan nimin khan Congress Bhavan-a political sesson-ah thu sawiin, an khingpuite'n an kah dan ang zel leh a aia náin an kah lêt zel dawn thu a sawi.
Lal Thanhawla chuan, political party dangte chu an insúm lo hle nia sawiin, "Hetianga an insúm lo zel a nih chuan, keini aia sawi tur ngah hi an awm bik lo. Party dangin musêpa min kah chuan LMG-in kan kap let thei a, LMG-a min kap a nih chuan laipuia kah letna tur kan nei a ni," a ti.
Political party dangin ram leh hnam tana rotling tur an thawh zawtin Hawla chuan, "Keini aia ram leh hnam rotling thawk tam an awm lo. Remna leh muanna ringawt pawh hi ram leh hnam tan rotling a ni. Horticulture College leh Veterinary College-te hi kan kutchhuak a ni," a ti a; MNF party sorkar lai erawh chuan PMGSY-a an ei zat tur percentage-ah an buai ṭhin niin a sawi.
Lal Thanhawla chuan, sorkar chu hmuia ‘run’ (kalpui) tur a ni lo tih sawiin, "Hmathlir thui tak nei chunga dikna, rinawmna leh taknaa kan kal a ngai zawk a ni. MLA term hmasaah khehpuam kheh vangin kan MLA pakhat kha minister aṭanga bàn turin MNF-te'n min rawn nawr a. Khehpuam kheh chungchangah keini aiin MNF-te'n an hrechiang zawk a, total bandh-te pawh an neih phah a ni," a ti.
Aizawl East-II bialtu MLA Lalsawta pawhin thu sawiin, Kushwant Singh, ziaktu ropui tak lehkhabu, 'The End of India' tihah chuan, India-in chhiatrupna, lirnghing leh indonate aiin, BJP-te an hlauhawm zawk a ni, tia a ziah thu sawiin, "BJP hlauhawmzia kan hriat a ngai," a ti a; inthlan dawnah BJP hian sum an séng tam ang ti ṭhin mah se, inthlan zawh hnuah sum hi an séng tam zawk dawn tih a sawi.
Lalsawta chuan, mi ṭhen-0khatte suma inlei tlin tum an awm ṭhin tih sawiin, "Ka khingpui tur pawh a hausa khawp mai. Nimahsela, sum sem ringawt hi Mizo mipuite hian kan ngaisang loin kan dah hniam tawh. Sorkarah eng hming pawh pu se, Modi-a te nen an inkaihkuah tlat chuan an duh duhin an kal thei lo a, Modi-a te duh danin an kal tho tho a ni," a ti.