CADC dan anga din a ni - Chakma NGO

Chakma NGO hrang hrang hruaitute October 11, 2018-a Chawngtea ṭuhkhawm chuan thuchhuah siamin, Chakma Autonomous District Council (CADC) chu dan ang leh Indian Constitution phal anga din niin an tarlang.

Chakma NGO-te thuchhuah chuan, YMA-in CADC ṭhiah a nih theih nana hma an la chu vanduaithlak an tih thu te, hnam leh hnam inkara boruak tichhe thei leh politics thila infuihpawrhna vang nia an hriat thu a tarlang a, "YMA-in dan loa din anga CADC a ngai hi hriatthiam theih a ni lo," a ti.

Chakma National Council of India (CNCI) zir chianna ang chuan, CADC chu Constitution of India hnuaia din a ni a, dan loa thil tih a awm loh thu te, Constitution of India-a Sixth Schedule hnuaiah dan ang takin CADC chu din a nih thu te, CADC din a nih theih nan North Eastern Areas (Re-Organisation) Act, 1971 leh Government of Union Territory (Amendment) Act 1971 te siamṭhat a nih thute an tarlang. CADC bakah, LADC leh MADC-te din a nih theihna tura dan ang taka thil tih a nih dante an tarlang bawk.

Chakma NGO-te chuan YMA chu autonomous district council din a nih theih nana Constitution-a Sixth Schedule tihdanglam a nih dante hre duh lo a, CADC ṭhiah a nih theih nana kawngzawh huaihawtah an puh a, "An thil tum hi politics thil leh hnam inen hranna thil a ni," an ti.

CADC din a nih dawnah Mizoram sorkar (UT) ràwn an ni loa sawi chungchangah Chakma NGO-te chuan, "Hei hi awmze nei lo a ni. Chakma, Lai leh Mara ten district council an dil chungchangah Commission din a ni a, Commission chuan a kaihhnawih (stakeholder)-te ngaihdan a la vek a ni," an ti. An tarlan danin, Commission-ah hian chairman chu SatyaJeevan Das, Mizoram UT administrator a ni.

Chakma NGO-te chuan, Mizoram sorkar leh sorkar laipui chu CADC chungchanga an dinna tichiagn turin an phût a; Mizoram sorkar chu hnam leh hnam inhuatna a thlen pawi ti loah leh hnam tenau zawk Chakma te dinhmun hrethiam duh lo a, an harsatna ngawihsanah an puh.

Mizorama Chakma-te chu hmanlai aṭanga awm tawh, Mizoram chu an ram a nia sawiin Chakma NGO-te chuan, "Hei hi British record aṭangin finfiah theih a ni. India rama tribe dangte ang bawkin Chakma-te hian kan chenna hmuna thuneihna chan theihna kan nei a ni," an ti a; Mizorama Chakma-te an pung chak lutuka sawi chungchangah, Mizoram chhunga hnam dangte pun dan nen a inang reng niin an tarlang bawk.

Chakma NGO-te meeting hi Mizoram Chakma Students Union (MSCU) general secretary Sontosh Chakma-in a kaihruai a, an press release pawh hi a hminga chhuah a ni.