ZPM hi kan ṭha bik kan ti lo, mahse, Kan kalphung a dang - F Rodingliana

Zoram Peoples' Movement (ZPM) chuan nimin khan an pisaah inkhawm an nei a; an senior vice president F Rodingliana'n thu sawiin, “ZPM hi kan ṭha bik kan ti lo, mahse, kan kalphung a dang. Sawhthing leh hmunphiah kan lei ngei dawn a ni,” a ti.

F Rodingliana chuan, tunlaiin mi ṭhenkhatin sawhthing lei thei lo tur leh lei mah se, kum tam tak lei thei lo tura an ngaih thu an sawi ṭhin tih sawiin, "Kum tin budget-ah cheng vbc. 300 pawh dah ila, tuna kan ruahman dan anga kan kal pui theih chuan kum nga hnuah chuan kan annual budge-ah vbc. 800 kan dah belh theih ngei kan ring zawk a ni,” a ti a; a man leh hralhna tur an hre sa tih a sawi.

Sawhthing chu rei tak lei theih a nih tur thu leh hrènpereng hrên hun laia hralh dan ang thoin global village-ah hralh theih a nih tur thu sawiin Rodingliana chuan, "Tunlai thiamna hmangin a powder aṭanga a in tur lam chi thlenga siam dan pawh kan hriat a. Mipuite hi sawhthing lei leh hralh kawnga lo buai lo tur leh thlamuang taka a rate hre saa chíng zawk turin kan chah a ni," a ti.

ZPM Sr. Vice Chairman chuan, an chief ministerial candidate Lalduhoma chu mihring a nih avangin a ṭhat famkim bik loh tur thu leh chu vang chuan amah dinpuia venpui tur committee lian pui pahnih an neih thu a sawi a, "Kan chief minister hrawn mek leh hrawn tawhte hi chuan min hruai thlen theih chin te, an thusawi tawh leh sawi tur lamin Vairengte aṭanga Sesih chhuah thlengin mipuiin an hre lâwk a ni," tiin a sawi.

F Rodingliana chuan, Congress leh MNF party-te chuan an president Lal Thanhawla leh Zoramthanga tel loin an party candidate tur an ruat ngam loh laiin, ZPM chuan an leader pahnih Lalduhoma leh Lalhmangaiha Sailo te tel miah loin an candidate tur an thlang tih a sawi a; ZPM a sorkar chuan chief minister-in department mal enkawl a nei dawn lo tih a sawi bawk.