Mission Indradhanush chungchang sawiho

District Task Force for Immunisation buatsaihin sorkar laipui hnuaia hriselna programme pawimawh, naupang kum hnih hnuai lam leh nu nau paite'n hri danna (immunisation) an lak vek theihna tura duan Mission Indradhanush chungchanga hmalaknate nimin khan Champhai additional DC K Vanlalṭhiana hoin DC conference hall-ah sawiho a ni.

K Vanlalṭhiana chuan, naupangte'n hri laka indanna an dawn chu an dikna chanvo a nih thu sawiin, "Mission Indradhanush hian naupangte dikna pek a tum tlat a ni. Universal Immunisation Programme hnuaiah Mission Indradhanush chu December 25, 2014 ah ṭan a ni a, kum 2020-ah chuan nausen 90%-te chu hri danna pek hman vek tum a ni," a ti.

Sorkar laipui programme duante chu a hlawhtlin theihna turin a guideline ang taka kalpui hram hram a ṭul tih sawiin K Vanlalṭhiana chuan, "Dik taka hna kalpui chuan sorkar laipui pawh ṭanpui turin a inhuam zau hle a ni," a ti a; meeting-a telte chu rawngbawlnaa ngaia programme hlawhtling tak ni thei tura theihtawp chhuah chhunzawm zel turin a chah.

District immunisation officer (DIO) Dr R Lianmawia chuan, Mission indradhanush hmangin naupang vaccine la lo leh la kim lote bakah, nu nau paite tetanus toxoid pek vek tum a ni tih a sawi a, "Vaccine la thei tur zawn hna thawh mek a ni a, October 16, 2018 hian a dawng turte hriat kim hman tum a ni. October 22-ah a dawng turte hnenah Health Sub-Centre tinah vaccine pek a ni ang," a ti.

DIO sawi danin, tun dinhmunah vaccine course la kim tawh mipa naupang 1,035 leh hmeichhe naupang 954, an vaiin 1,989 an awm a; thual nawn lehna nei tura thawh mek niin, la la ve lo leh la kim lo awm angte chuan Octobrer 22-ah an la ve leh dawn a ni.