Mizoram State Day vawi 35-naah Chief Minister-in mipuite chibai a bûk

Nimin February 20, 2022 kha Mizoram state-a hlân kai a nih champha vawi 35-na, State Day a ni. State Day hi chief minister Zoramthanga chuan Mizoram mipui tan hlimna leh malsawmna ni thei se a duh thu sawiin chibai a buk.

State Day pual hian Chief Minister chuan nimin khan thuchah a tichhuak a, "He ni ropui tak, Mizoram state pian champha kum 35-na hi Zoram mipui zawng zawng tan hlimna leh malsawmna a nih theih nan chibai ka bûk che u a, in vai tan duhsakna ka hlan a che u. He ní hi ram tana malsawmna ni ropui a nih theihna turin lawmawm tia min duhsaktu pawh kan nei. Prime Minister, Union minister-te leh ṭhian ṭha dangte aṭangin duhsakna thu kan dawng a ni," a ti.

CM Zoramthanga chuan, kum 1986-ah inremna neih a nih thu sawiin, "A kum leh, 1987-ah state kan nei ta a ni. Vawiin ní ang, February 20, 1987-ah Mizoram chu state-ah puan kan ni. Chu chauh chu ni loin, special protection neiin state putling takah kan lo chang ta a ni," a ti a, Mizoramin state a nih hnua kum 35-na champha a hmu thei chu lawmawm a tih thu a sawi.

State Day chu Pathianniah a tlâk avangin a puala hun hman a rem loh thu sawiin Zoramthanga chuan, "Kan awmhmun ṭheuhah kan State Day hi Zoram mipuite in vaia ṭha taka in hman ka duhsak che u a ni," a ti.

Mizoram hi Assam state hnuaiah district council anga hun eng emaw chen a awm hnuah kum 1972 khan union territory-ah hlàn kai a ni a, chuta ṭanga kum 15-na, February 20, 1987-ah state puitlingah hlân kai a ni.

Kum 1987-ah vêk khan Arunachal Pradesh chu state puitling a ni a, hmarchhak state zingah Mizoram nen state puitling ni hnuhnung ber an ni.